Ternera Gallega

A Indicación Xeográfica Protexida formou parte de ‘Navidad Saludable’, un showcooking dirixido aos medios de comunicación gastronómicos, sobre turismo e de carácter xeralista, no que se propuxeron pratos gourmet e saudables de cara as comidas e ceas do Nadal. O menú compúxose de alimentos con orixe española, que conxugan a tradición, a calidade e o equilibrio nutricional, co obxectivo de promover a boa materia prima que se produce en todo o país.

Relevo xeracional e discriminación positiva para manter a poboación no rural. Son as principais claves que se abordaron no foro ‘Presente e futuro do agro galego’, organizado polo xornal El Correo Gallego e que contou coa participación do presidente do Consello Regulador, Jesús González, o secretario xeral de Unións Agrarias, Roberto García, e o director de compras de Vegalsa, Jorge Eiroa. 

González apostou, neste debate, por medidas que favorezan que a poboación se manteña no rural, como mellorar o acceso á vivenda ou as comunicacións, tanto por terra como as conexións online. Considera imprescindible o relevo xeracional, xa que o sector cárnico conta con titulares de explotacións de idade avanzada e é necesario, lembra, reestruturar estas ganderías para mellorar en competitividade. Neste sentido, o presidente do Consello Regulador recordou que o minifundismo propio de Galicia é un factor moi negativo e que as políticas desenvolvidas ata agora non deron os resultados axeitados despois de anos de aplicación. 

Ternera Gallega participou esta fin de semana no Mercado Experiencias de Calidade de Galicia, organizado pola Agacal dentro do XV Outono Enolóxico de Segovia. A Praza Maior da cidade foi o escenario de varias catas e demostracións culinarias dos produtos galegos con IXP e DOP co obxectivo de promover a súa excelencia e variedade. A carne certificada protagonizou un showcooking e formou parte de diferentes degustacións, coa versatilidade do produto como fío condutor.

O chef do Restaurante España (Lugo), Héctor López, dirixiu unha ampla demostración gastronómica con pezas moi diferentes e preparacións para todos os gustos. Para o seu mítico steak tartar escolleu a croca, mentres que o redondo foi o corte axeitado para cociñar en rosbif e presentar como un vitello tonnato. Para a grella, López optou pola tapa da pa e o filete de vacío. E rematou cunha costela asada, acompañada de IXP Castaña de Galicia e crocante de IXP Grelos de Galicia. 

Tras pasar por Xantar, a IXP chegou á cidade condal para formar parte do Gastronomic Forum Barcelona, unha cita destacada no ámbito da cociña e da hostalaría, que reúne a máis de 130 relatores e suma 42 estrelas Michelín. Desde o stand da Consellería do Medio Rural, Ternera Gallega amosou a calidade do produto certificado cun showcooking que puxo en valor as pezas singulares.

Baixo a dirección do cociñeiro José Manual Mallón, os profesionais hostaleiros asistentes puideron coñecer as cualidades organolépticas da carne certificada e as posibilidades culinarias de cortes como a tapa da pa ou a bavette. Pezas que o chef cociñou no momento, á prancha, para demostrar, dunha forma sinxela e sen gornicións, o seu sabor e moleza. 

O Consello Regulador únese á Fundación Juana de Vega e a Cooperativa A Carqueixa, en colaboración co Centro de Investigacións Agrarias de Mabegondo (CIAM), para poñer en marcha un proxecto, de 2 anos de duración, que estudará o modelo produtivo típico no sector do vacún de carne galego. Trátase do Grupo Operativo `Rede galega de granxas modelo´, que conta cun dobre obxectivo: calcular os custos de produción para contribuír á correcta aplicación da Lei da Cadea Alimentaria e proporcionarlle información económica e financeira relevante aos gandeiros coa meta de mellorar a xestión das súas explotacións, favorecendo a súa viabilidade, sostibilidade e competitividade.

Un ano máis a IXP acode a Xantar, o Salón Internacional de Turismo Gastronómico, que celebrou a súa 25ª edición en Ourense entre o xoves e o domingo. Ternera Gallega foi a protagonista dunha demostración culinaria que viaxou, a través de diferentes pezas, desde os pratos pouco cociñados ata as receitas de prancha e guiso. Unha variedade de propostas gastronómicas que amosaron a versatilidade do produto amparado. 

Dirixiu a sesión o chef de O Sábrego Restaurante (Ribadavia), Marco Varela, que comezou elaborando un tataky de croca con vinagreta de queixo San Simón da Costa. Unha opción fresca, na que a carne só se marca polos seus lados. Seguiu na prancha cun corte menos habitual nas cociñas, a bavette, que acompañou con pastel de Pataca de Galicia. Esta preparación sinxela permite amosar ao público asistente pezas pouco coñecidas pero que alcanzan resultados culinarios á altura das máis populares.