O programa de formación do Consello Regulador continúa en marcha 

Dous novos seminarios seguen afianzando as actividades que Ternera Gallega dirixe á formación de diferentes colectivos, desde estudantes de hostalaría e chefs a carniceiros e cadeas de distribución. Nesta ocasión, a IXP recibiu na súa sede a unha vintena de profesionais de carnicería de Gadis e aos cociñeiros e cociñeiras doutros 16 comedores escolares de varios puntos de Galicia. O obxectivo é  que coñezan mellor a carne amparada, as cualidades que a distinguen e as posibilidades gastronómicas das súas pezas.

Como punto de partida, os cursos comezaron abordando que é unha IXP e que asegura este selo en canto a calidade e a orixe. Tamén trataron o tipo de animais e razas admitidos, o seu sistema de crianza e a alimentación que reciben segundo as diferentes categorías comerciais. Un debuxo da actividade das Denominacións que permitiu recoñecer a súa importancia para o medio rural e para a súa sostibilidade socioeconómica e ambiental.  

Rastrexabilidade 

Sobre o sistema de control de Ternera Gallega falou o responsable de Puntos de Venda, Xosé Manuel Ons, que explicou o seguimento da rastrexabilidade desde a identificación dos animais nas ganderías ata a certificación dos canais nas industrias e a correcta identificación da carne nos establecementos que a comercializan. Un tema de interese para os carniceiros e carniceiras presentes xa que, como profesionais de centros con acordo de colaboración coa IXP, deben achegar  a documentación que acredita que a carne que venden é certificada e, ademais, presentala correctamente ante os consumidores coas etiquetas e certificados de garantía correspondentes. 

Na práctica

Do tratamento adecuado do produto e de amosar a versatilidade das diferentes pezas encargáronse o chef Xosé Manuel Mallón e o director de Promoción da IXP, Luis Vázquez. Destacaron a calidade e as opcións culinarias dos cortes menos habituais ou pouco coñecidos e explicaron a maneira de preparar cada un deles segundo sexan máis apropiados para a prancha ou para guisar.  

Estes seminarios proporcionan información e ferramentas aos profesionais de carnicería co obxectivo de que se convertan nos mellores asesores para os clientes das cadeas de distribución. No caso dos cociñeiros e cociñeiras dos comedores escolares, tamén amplían a súa formación para coñecer pezas axeitadas aos menús infantís e que se axusten á súa planificación económica.