O Consello Regulador forma aos alumnos do Carlos Oroza no vacún galego de calidade

Os estudantes de 1º de Dirección de cociña Dual do CIFP pontevedrés asistiron este martes a un seminario teórico e práctico sobre os aspectos tecnolóxicos e culinarios da carne certificada. Co obxectivo de que os futuros profesionais da restauración coñezan a calidade do produto amparado e a súa versatilidade gastronómica, puideron traballar directamente con diversos cortes de Ternera Gallega.

Pezas coma a tapa da pa, o vacío, a bavette ou o corte redondo permitiron que os estudantes se achegaran aos cortes singulares, máis aló dos habituais e coñecidos coma o lombo e o solombo. Comprobaron as diferentes posibilidades que ofrecen nos fogóns, tanto a nivel doméstico coma profesional, coñecendo os usos máis axeitados para cada peza. Ademais de cortar, preparar e cociñar estas pezas, puideron aprender as mellores técnicas e consellos para sacarlle o máximo partido ao produto e potenciar a súa moleza e sabor propios, abordando cuestións coma a maduración da carne, o seu temperado ou o sentido do corte. 

Antes desta formación práctica, o director de Promoción, Luis Vázquez, explicoulles as cualidades diferenciais da carne de Ternera Gallega e de Vaca Galega-Boi Galego, o significado do selo IXP e a relevancia que teñen as máis de 8.200 ganderías inscritas para manter vivo o medio rural a nivel socioeconómico e medioambiental. 

Tamén expuxo o programa de control e rastrexabilidade que o Consello Regulador aplica desde as ganderías e industrias ata os puntos de venda, para certificar a calidade da carne amparada e o seu correcto etiquetado.