Ternera Gallega

Como é tradición, Ternera Gallega participou un ano máis na Festa do Pan de Cea, que se celebrou esta fin de semana no Campo da Saleta, chegando xa a súa XXXIII edición. O produto certificado serviuse en empanada e ao caldeiro no xantar oficial do domingo, onde tamén compartiron mesa outros produtos galegos con selo de calidade. A combinación perfecta coas 1.500 pezas que despachou Pan de Cea. 

A festa comezaba a mediodía, coa presentación dunha exposición e do libro fotográfico ‘San Cristovo de Cea onde o Pan é Arte’, para continuar coa lectura do pregón a cargo da conselleira do Mar, Marta Villaverde. 

A súa propia experiencia serviulle de guía para crear Vacantes.gal, un portal gratuíto que funciona como unha rede de contactos para cubrir necesidades laborais, sociais ou culturais no medio rural. Cando Mónica Requeijo, enxeñeira de profesión, se fixo cargo da explotación do seu pai en Abadín (Lugo), tamén debeu recorrer á axuda dos veciños para cuestións que ela mesma non sabía facer, desde arranxar un peche ou picar leña ata buscar un fontaneiro.  

Máis de 200 anos de historia do rural galego, da súa gandería o de seu patrimonio condénsanse nesta casa de labranza da parroquia de Trasliste, no concello de Láncara. Un punto de encontro entre a tradición agraria e a súa modernización máis recente; que ademais da gandería actual, inscrita na IXP Ternera Gallega, tamén acolle unha explotación de mazás ecolóxicas e o Muvicla, o Museo Vivo e Integrado do Campo e a Locomoción Agraria. Así é Casa Vázquez, que recibiu a visita do presidente do Consello Regulador, Jesús González, e do director de Promoción, Luis Vázquez. 

Alumnado e familias de infantil e primaria remataron este curso escolar cunha xuntanza na que puideron probar as cualidades diferenciais da carne amparada. O cociñeiro negreirés, Xosé Manuel Mallón, especialista no vacún de carne e colaborador habitual da IXP, ofreceu dúas degustacións diferentes cuns 500 petiscos.

Serviu unha merenda sinxela pero saborosa e mol como é o pepito de Ternera Gallega, co que pequenos e grandes puideron achegarse ao produto amparado e ás súas características organolépticas. Unha das degustacións foi no CRA A Tarandeira, con estudantes de Coristanco, A Baña e Santa Comba; mentres que a outra realizaouse no CIP San Vicente de A Baña. 

A terceira tempada da Escola de Cociña da IXP arranca esta semana cunha proposta sinxela e rápida, pero moi visual e perfecta para os amantes da carne. Despois da presentación oficial dos novos contidos audiovisuais de Ternera Gallega e de Vaca Galega-Boi Galego, as dúas Denominacións empezan a lanzar os primeiros vídeos, con ideas frescas, saborosas e fáciles de reproducir nas nosas cociñas.

Carne certificada de Ternera Gallega Suprema e un pouco de técnica. Non fai falla nada máis para preparar este entrecosto, rico e zumarento, tal e como nos ensina un dos grandes expertos do vacún, o cociñeiro Javier R. Ponte, “Taky”. Un vídeo co que, en menos de 10 minutos, aprenderemos os conceptos que afectan á moleza, aos zumes e ao sabor da carne; ademais dos mellores consellos para resaltar as súas cualidades organolépticas. 

A Asociación Española de Denominacións de Orixe celebrou as súas XVII Xornadas Técnicas e a Asemblea Xeral en Zamora entre o 3 e o 5 de xuño, reunindo a preto dun centenar de figuras de calidade para tratar cuestións de interese conxuntas e desafíos de futuro. Dúas xornadas de traballo nas que a IXP Ternera de Aliste exerceu de anfitrioa.

Un dos asuntos abordados foi a IA e os seus retos, a cargo da directora da Cátedra Internacional Enia Inteligencia Artificial e Agricultura da Universidade de Córdoba, Rosa Gallardo, e do director da cátedra Atmira Open AI e BIG Data, José Raúl Romero. Nesta cuestión, o presidente de Origen España, Ángel Pacheco, destacou que as novas tecnoloxías son cada vez máis necesarias en toda a cadea de valor, tanto nas explotacións como nas industrias, e supoñen un gran potencial para atraer aos mozos e mozas ao sector, especialmente nun momento de escasa remuda xeracional.