O Consello Regulador leva a formación sobre a carne certificada a Madrid

Ademais de enfocarse en diferentes colectivos de Galicia, Ternera Gallega tamén estende a súa oferta formativa a outras zonas de fóra da comunidade. Nesta ocasión, o seminario sobre a carne de vacún de calidade dirixiuse aos 35 alumnos da escola de gastronomía MOM Culinary Institute de Madrid, que puideron afondar en todo o que significa o selo IXP e nas características e a variedade das diferentes pezas do produto amparado.

Os cortes pouco coñecidos entre os consumidores, e mesmo entre os profesionais cárnicos e da cociña, foron o fío condutor da formación práctica. O director de Promoción do Consello Regulador, Luis Vázquez, explicou a versatilidade de pezas como o vacío, a tapa da pa, o corte redondo ou a tapa; incidindo en que non existen pezas de primeira ou de segunda categoría, senón pezas e usos culinarios. O tratamento previo e a forma de cociñado permiten obter a máxima calidade e sabor finais, polo que recalcou cuestións como a maduración da carne, o seu temperado, o sentido do corte ou as mellores técnicas a empregar segundo os obxectivos culinarios. 

A orixe

Antes de que os alumnos e alumnas traballaran directamente coa carne certificada, Vázquez tamén os achegou ao tipo de producións e animais que amparan as IXP Ternera Gallega e Vaca Galega-Boi Galego. Aclarou, ademais, as diferentes categorías comerciais de cada unha e as cualidades que as definen, destacando as etiquetas que as distinguen no mercado como único aval da orixe e da calidade do produto. 

Con este tipo de actividades formativas, o Consello Regulador aproxima aos futuros chefs as características das carnes certificadas, a súa versatilidade culinaria e comercial e a relevancia que ten para o mantemento do medio rural que os profesionais da cociña escollan produto con orixe garantida.